我係一隻環保嘅企鵝（下）
　　
但有一年嘅夏天，特別熱。

...

我係一隻環保嘅企鵝（下）
　　
但有一年嘅夏天，特別熱。

我雖然變咗做人形，但我骨子裡都仲係一隻企鵝，屬於南極嘅企鵝，呢個夏天令我好難捱。

有一次，我去一個義工屋企開會，感受到久違嘅涼浸浸空氣。

我沉醉咗一陣，先突然醒悟：「你開咗冷氣？冷氣咁唔環保。」

開冷氣嗰個義工反駁：「天氣咁熱，再唔開冷氣，大家都熱死咗，仲邊有得環保？」

其他義工紛紛附和，我都唔好意思強逼大家熄冷氣。
　　

嗰兩個鐘嘅會，係我嚟到人類社會後，最快樂嘅兩個鐘。

清涼嘅感覺從我肌膚，滲入我嘅心底，由外而內，再由內而外咁涼番出嚟。

開完會，我返到屋企，都忍唔住懷念嗰種感覺。

我開始會特登去商場同餐廳涼冷氣，但涼得愈多冷氣，夜晚瞓覺就愈覺得熱，熱到瞓唔著。
　　

於是，我偷偷喺屋企裝咗部冷氣機，自己享受冷氣。

天氣漸漸變凍，但對於企鵝嚟講，仲係好熱，所以我繼續開冷氣。
有咗冷氣，就會有其他嘢。

我不得不承認，人類嘅發明雖然唔環保，但真係好方便同實用。
　　
＊＊　　　　　　＊＊　　　　　　＊＊
　　
五年後，有一日，我喺m記買咗個魚柳包餐，再去超市買咗一袋日用品，買咁多嘢，梗係要拎埋膠袋啦。

我一手拎住m記外賣，一手拎住一個大膠袋，悠然自得咁行番屋企，屋企已經開大咗冷氣，一返到去就有得涼。

去到門口，突然有個男人衝埋嚟，用力攬住我，個衝力大到令我手上嘅嘢跌晒落地。

佢係邊個？佢個樣好陌生，但佢身上嘅氣味好熟悉。
　　

個男人大叫：「老豆，我終於搵到你啦！」

老豆？我係一隻企鵝嚟，我點會有個仔呢？

咪住先……企鵝？

「我係阿明啊。你嚟到人類社會，勢單力薄，所以你走咗之後，大家都好努力修練，希望儘快嚟幫你。」
我嘅企鵝仔仔阿明，好自豪咁講：「我就係繼你之後，第二隻修練到人形嘅企鵝。」
　　

我終於有伴啦！

喺人類社會，我都識到唔少朋友，但我唔敢向人類坦白我嘅企鵝身份，始終好似隔咗一層咁，人鵝歧途，冇辦法交心。

依加阿明嚟咗，遲吓仲會有更多同胞一齊嚟，開開心心咁生活。
　　

阿明繼續講：「老豆，你推廣環保搞成點啊？我都了解咗一啲環保資訊，我哋兩父子拍住上……」

佢話未講完，突然望到地下嘅日用品同m記外賣。

阿明大叫：「點解你會用膠袋？仲會用外賣盒？」

「唔好咁大聲。」我連忙捂住佢把口：「我哋入屋慢慢傾。」
　　

我一開門，一陣涼風撲面而來。

「嘩，老豆，你呢度仲凍過南極喎！你開咁大冷氣嘅？」阿明又驚叫：「我哋唔係要推廣環保咩？」

我想解釋，但作為企鵝王，我搵唔到任何有力嘅理由，去解釋我嘅行為。

我沉默，佢憤怒。
　　

每一隻企鵝，都曾經想做一個環保鬥士。

但入咗花花世界，唔係每一個環保鬥士，都記得自己其實係一隻企鵝。
　　
—完—
　　
將專頁設定為「搶先看」/ "See first"，最新故仔馬上睇！
　　
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
　　
#短故 #短篇 #小說 #陳美濤 #廣東話 #粵語 #tomatochan #我係一隻環保嘅企鵝

---